पारिजात - - अभिजीत दाते

आज उन्मळून पडलो वादळात मी...

तुझ्या अंगणी होतो पारिजात मी...

तुझे येणे येता येता राहून गेले ,

होतो त्या वळणावर वाट पहात मी...

पालवीच्या स्वप्नांवरती जगलो तरीही ,

झडतच गेलो प्रत्येक वसंतात मी...

काट्यांनी निदान नाती जपली असती ,

उगाच गुंतलो होतो पाकळ्यात मी...

निखा-याची धग आता जाणवत नाही ,

इतके दिवस होतोच की वणव्यात मी...

सावली आहे मी तुझी, म्हणाली होतीस ;

म्हणून आयुष्यभर राहिलो उन्हात मी...